Демонстрантите со ултиматум до босанските власти: матични броеви или нови протести!

Добивај вести на Viber

Парламентарното собрание на Босна и Херцеговина има рок до 30 јуни да донесе закон за единствениот матичен број на граѓаните (ЕМБГ), одлучија организаторите на денешниот протест во Сараево, по што соопштија дека  официјалниот дел од протестите е завршен. Веќе втора недела илјадници граѓани учествуваа во антивладините протести, наречени и „бебешка револуција“, бидејќи беа иницирани од случајот со тримесечно бебе кое поради немањето ЕМБ не можеше да замине на лекување во странство. И денеска 3 илјади лица или двојно повеќе од вчера се собраа во Сараево и ги повикаа политичарите да почнат да си ја вршат работата и да престанат со етнички спорови. Законот за ЕМБ беше одложуван  со месеци, затоа што партиите на босанските Срби инсистираат двете административни единици (Република Српска и Муслиманско-хрватската федерација) да имаат одделна граѓанска регистрација, а пратениците муслимани и Хрвати се за единствен систем за цела Босна и Херцеговина. И покрај официјалниот крај на протестот, организаторите повикаа демонстрантите и во следните денови, симболично во пет до 12 да се собираат на истото место и да им повторат барања на властите.