ДЕНЕСКА Е БОЖИК: Г.Г. Стефан со посебна порака – да заврши страдањето од подмолната болест и да биде време на благодарност до здравствените работници

Добивај вести на Viber

Православните христијани денеска го чествуваат Христовото раѓање. Ова е еден од најрадосните празници, а синоќа на бадниковата вечера на најсреќните во семејствата, според многувековната традиција им падна паричката. Според верувањето, оној на кој ќе му падне паричката, во текот на целата година ќе биде здрав, среќен и бериќетен.

Поглаварот на МПЦ, Г.Г. Стефан во божикната порака до верниците истакна:

-Нека годината којашто доаѓа биде време на победа над злото и над непријателствата коишто владеат со светот, да биде време благопријатно за изобилни духовни плодови и време во кое ќе заврши страдањето од подмолната болест, нека биде и време на благодарност до здравствените работници, чија саможртва треба да биде за пример. Еве, и во 21-от век, за жал, продолжува оспорувањето на правото за национално самоопределување, како и непочитувањето на човековите права и слободи. Некои заборавија дека само она што се потпира врз вистината и правдата, дека само тоа што се создава во мир и со љубов, само тоа останува да живее во времето. Сегашноста и иднината не создале и не можат да создаваат минато или, по нечија желба, да го менуваат истото. Само луѓето и народите, поучени од минатото, можат да се менуваат и да се поправаат, за лошото да не се повтори. А историјата ни сведочи дека на сè што се потпира врз сила и невистина, кога-тогаш му доаѓа крајот. Затоа, како македонски народ, пред никого и за ништо да не отстапуваме од своето, од вековното! – порача г.г. Стефан.

Христос се роди! Вистина се роди!