ДЕПРЕСИЈА, АНКСИОЗНОСТ, ОТУЃУВАЊЕ: Кои се последиците по психичкото здравје од пандемијата?

Добивај вести на Viber

Несоница, анксиозност, депресија и други проблеми ги мачат луѓето. Поради пандемијата на коронавирусот многу граѓани  чувствуваат последици по психичкото здравје. Велат дека нивните навики и начинот на живот денес не се исти како пред појавата на коронавирусот. Психологот Билјана Атанасовска објаснува дека секој човек различно се носи со овие психолошки состојби.

„Она што можам да го кажам и од сопствено искуство во психолошката работа со моите клиенти е дека пандемијата и поврзаните случувања со неа, ги интензивираа постоечките психички слабости кај некои луѓе и тие станаа понагласени психички проблеми. Но, исто така се зголеми и бројот на клиенти со новонастанати психички проблеми. Најчесто се работи за зголемена анксиозност, депресивност, пострауматски синдром, нагласено чувство на „необјаснив“ замор, растројства во спиењето, социјално отуѓување (повлекување, немање желба за дружење) и други понеспецифични последици. Сепак, кај луѓето со поголема психичка резилиентност, ваквите последици беа со многу помал интензитет и/или се покажаа како пократкотрајни и полесно минливи“, вели Атанасовска, психолог во советувалиштето „Божилак“ во Битола.

Објаснува дека коронавирусот го поттикна чувството на страв кај луѓето, кај оние кои го прележаа, но и кај другите кои се трудеа да се заштитат на најдобар можен начин.

„Прво стравот од непознатото за „страшниот вирус“ (одговорните не знаеја како се пренесува, како се превенира, а најмалку како се третира/лечи и тоа тековно го студираа), а потоа стравот од смртта, која преку ударните известувања на сите медиуми, како и преку личните загуби на членови од семејството, стана постојан, сеприсутен гостин во сечиј дом. Бевме притиснати да се штитиме од нешто „страшно и смртоносно“, а не знаевме како, со што, до кога... Долготрајното живеење под разноразни ограничувања, а сепак неизвесност и интензивен страв, секако дека има значајни последици врз психичкото здравје на луѓето. Сега веќе има и податоци поткрепени со истражувања за разните видови последици, во зависност од возрасната група на која припаѓаат испитаниците, нивното претходно психо-физичко здравје, социјалниот статус и слично“, додава психологот.

Граѓаните велат дека поради пандемијата, денес помалку се дружат и поретко одат кај роднини и пријатели. Некому помалку, а некому повеќе, пандемијата му влијаела на психичката состојба.

„Јас не се плашев од вирусот, но си внимавав, ги следев насоките од лекарите, а имаше луѓе кои ги фаќаше паника. Јас немам никаква последица, но кај другите луѓе има промени“, вели Јулијана Атанасоска, граѓанка.

Друга граѓанка објаснува дека пандемијата „удри“ по социјалниот живот.

„Уште си внимавам на здравјето, се чувам, избегнувам дружби и не е како што беше порано. Исплашени бевме кога имаше многу заразени, бевме под стрес“, рече Славица Петрушева, граѓанка.

Има и граѓани кои поради коронавирусот, последниве години воопшто не патувале во странство.

„Јас ја прележав короната, лесно. Не ми е страв. Веќе не ни мислам на тоа. На психата не ми влијаеше. Во странство не сум била откако почна пандемијата“, вели Анета Божиновска, граѓанка.

Коронавирусот се појави во 2019 година во градот Вухан во Кина. Според податоците од worldometeres, над 6.8 милиони луѓе во светот починале од коронавирусот. 

Сања Атанасовска