Десет месеци, а не се потрошени ни половина од капиталните инвестиции
Објавено во: Економија 26 Ноември, 2019
Државните институции и министерства потрошиле до октомври само 40 отсто од предвидените пари за капитални инвестиции за годинава. Впрочем потрошени се 150 милиони евра од предвидените над 369 милиони евра за цела година. Дополнително капиталните инвестиции беа намалени со ребалансот на буџетот, а претходно Владата предвиде за оваа намена за годинава дури 425 милиони евра.
Реализацијата на капиталните инвестиции или тие од кои се очекува да го покренат растот на економијата се покажа како проблем и лани, трендот продолжи и годинава. Иако власта тврди дека дел од проектите кочат поради некои трети фактори, сепак потфрлувањето е значајно.
Владата предложи ребаланс на буџетот на почетокот на септември годинава и со него ги скрати за 50 милиони евра капиталните инвестиции. Со прекројувањето отпаднаа планираните инвестиции во железницата, во проектите во образованието, во водоснабдувањето, дозиградбата на Коридорот 10. Тогаш министерката за финансии Нина Ангеловска рече дека се кратат средства од капиталните трошења кои биле со слаба реализација и се финансирани со кредити. Познавачите бараат да запре практиката, секоја година наместо да се реализираат предвидените, парите за овие трошења да се намалуваат.
За идната година или во буџетот за 2020 година за капитални трошоци проектирани се 23 милијарди денари или 374 милиони евра.
А.Т.