Директорот на ЦИА му се спротистави на Трамп за Русите
Објавено во: Свет 12 Ноември, 2017
Американскиот претседател Доналд Трамп доби контра одговор од Мајк Помпео, директорот на Централната разузнавачка агенција, Мајк Помпео, кој и натаму останува на проценката на тајната служба дека руската влада преку своите служби влијаела врз претседателските избори во ноември минатата година.
Оваа реакција на Мајк Помпео и ЦИА доаѓа откако Трамп на АПЕК самитот во Виетнам посочи дека добил одговор директно од Путин дека Русија како држава не вршела никакво мешање на изборите во САД и дека му верува на неговиот збор.
– Заклучоците на разузнавачките служби поврзани со мешањето на Русија на изборите не се променети, се вели во соопштението на ЦИА.
Да потсетиме дека назначувањето на Помпео дојде по давањето согласност од страна на Доналд Трамп, па така ова спротиставување на ставовите за прв пат дава јасна политичка порака дека ЦИА и претседателот на САД се практично на две различни страни.
Трамп вчера, од главниот град Ханој на Виетнам, рече дека има добри односи со Путин, за кој смета дека е навреден поради обвиненијата за мешање во американските претседателски избори.
Американскиот претседател рече дека Путин повторил дека не се мешал во изборите минатата година што уште еднаш ја разбесни американската јавност, особено демократите кои се обидуваат да го поврзат Трамп со руските влијанија и да го сменат од функцијата.