ДУИ: ВМРО-ДПМНЕ да испрати претставник во комисијата за уставни измени
Објавено во: Македонија 02 Април, 2023
ДУИ го повика ВМРО-ДПМНЕ да испрати свој претставник во работната комисија за уставни измени, откако најголемата опозициска партија објави за неа прифатлив предлог според кој преамбулата на Уставот би претрпела измени според хрватскиот модел.
„Сметаме дека по оваа одлука ВМРО-ДПМНЕ треба да испрати претставник во владината комисија за уставни измени и да почне еден инклузивен процес. Во текот на тие разговори ќе увидат дека вклучувањето, а не исклучувањето на заедниците во нашата држава ја прави оваа држава посплотена, похармонична и поевропска“, гласи коментарот на ДУИ по објавениот предлог на ВМРО-ДПМНЕ.
За Алијанса на Албанците предлогот е неприфатлив и од таму сметаат дека примерот со Хрватска е несоодветен за македонски прилики, при тоа користејќи се со проценти од вкупното нерезидентно и резидентно население.
„Решението што го нуди овој политички субјект во однос на Преамбулата е апсолутно непознавање на реалноста или намерно отстапување за изборни ефекти, реагира Алијанса на Албанците на повикот на опозициската партија да го следиме хрватскиот терк при уставните измени.
Времето на доминација на еден етникум во Северна Македонија заврши еднаш засекогаш и нема враќање во такво време. Македонците се 54%, а Албанците 30% и заедно не го сочинуваат процентот на Хрвати во Хрватска кои се над 90%. Поставувањето на Албанците во нивниот предлог како национално малцинство уште еднаш покажува дека нивниот менталитет е вратен со децении наназад и тоа е за жалење“, изреагираа од Алијанса за Албанците.