Еден Албанец денес се чувствува многу побезнадежно од еден Сириец, вели Мета
Објавено во: Балкан 22 Јануари, 2021
Зема замав иселувањето во Албанија.
„Еден Албанец денес се чувствува многу побезнадежно од еден Сириец, Ирачанец или Авганистанец“, вели албанскиот претседател Илир Мета.
Мета ги објави загрижувачките податоци на Евростат, за бројот на албански граѓани баратели на економски азил на 10 илјади жители, во периодот 2014-2019 година. Во тие 5 години економски азил во некоја од земјите на ЕУ побарале 189.975 албански граѓани.
„Албанија во 2019 година е на прво место во Европа според бројот на економски баратели на азил на 10 илјади жители. Врз основа на податоците на Евростат, Албанија ја забележува најголемата нето миграција, во споредба со сите други балкански земји. Албанија зад себе ги остави и земјите кои штотуку излегоа од војна и граѓански конфликти“, наведува Мета.
Државниот Институт за статистика во Албанија потврдува дека вкупниот број албански граѓани кои живеат во странство изнесува околу 1,7 милиони. ИНСТАТ објави дека во периодот 2011 – 2019 година Албанија ја напуштиле повеќе од 360.000, при што главната причина е од економска природа.