EKОЛОГИСТИТЕ ЗГРОЗЕНИ ОД ПОЖАРИТЕ: Шумите не се чуваат со седење во канцеларии

Добивај вести на Viber

Екологистите се згрозени од големите штети кои ги предизвикаа пожарите во земјава, посебно оној во велешко, кој го гаснеа пожарникари од повеќе општини. Изгорени се 400 хектари шума и трева. Борбата со огнот траеше повеќе од осум часа.

Јорданка Калајџиеска од еколошкото друштво „Виножито“ од Штип вели дека штетите се огромни, а последиците ќе ги трпиме сите. Таа вели дека наместо да седат во канцеларии, надлежните треба да бидат на терен и да ја следат состојбата. 

„Ние ништо не правиме, ние само констатираме, и тоа е жалосно. Уништена е и флората и фауната. Кој сега ќе ја обнови таа шума кога немало кој да ја заштити? Плус тој загаден воздух од самото горење го дишеме сите на ова жешко време. Има полиција, шумска полиција, и треба тие да патролираат, да дежураат на ова топло време. Знаеме како функционираа работите во времето на Југославија, а зошто сега да не може? Сме биле во посета на шумска полиција како здружение и рекоа луѓето дека немаат ресурси за да одат на терен. Треба да им се дадат возила, бензин, и да можат да патролираат“, вели Калајџиеска.

Со децении шумата која е изгорена нема да може да се обнови.

„Порано постоеше Ден на дрвото, и ние како здружение одевме да пошумуваме, тоа беше добро, макар половина од дрвцата да се зафатеа има корист за сите“, додава Калајџиеска.

Од Македонското еколошко друштво велат дека контрола треба да има преку цела година, а посебно преку лето, па дури и да се пријавува движењето во шумите.

„Треба постојано да има контроли, посебно во овој период, во лето секој ден, и да се подигне јавната свест. Да се внимава кој што прави, да се пријавува индивидуалното движење или движење во помали групи, и доколку нешто се случи да може да се реагира веднаш. Ова е не само за шумите, туку и за земјоделските површини затоа што луѓето преку лето се на нива“, додаваат од Македонското еколошко друштво.

Во гаснењето на пожарот учествуваа пожарникари од Велес, Свети Николе, Штип, Кавадарци, Неготино и Скопје, припадници на армијата, два трактори на Дирекцијата за заштита и спасување (ДЗС) и еден армиски хеликоптер, а помош пристигна и од вработените во шумските претпријатија.

Полицијата вчера приведе четири лица, кои се осомничени дека додека работеле од невнимание го предизвикале пожарот.

Огнот избувна околу 11:40 на влезот во Велес од правец на Скопје, потоа се префрли кон Езеро Младост и автопатот Велес – Скопје, па се спушти до автопатот Скопје – Велес, кај наплатна рампа Сопот.

Сања Атанасовска