Елементарна непогода – една четвртина од Словенија без струја!

Добивај вести на Viber

Снегот и мразот во Словенија предизвикаа проблеми во сообраќајот и во снабдувањето со електрична енергија. Според проценките, без струја се околу една четвртина од словенечките домаќинства. „Состојбата не е добра, станува збор за елементарна непогода од поголеми размери“, оцени словенечкиот министер за одбрана Роман Јакич, по средбата со службите за вонредни состојби. Се проценува дека без струја во различни делови на државата се околу 240.000 лица и дека санацијата на состојбата може да потрае „со денови, па и со недели“. Словенечките власти синоќа прогласија вонредна состојба заради невремето и побараа помош од странство, по што во текот на ноќта пристигнаа дополнителни агрегати од Чешка, Германија и Австрија. Меѓутоа, здравствените служби посебно ги предупредија оние кои за струја користат агрегати на опасноста од труење со јаглерод моноксид во случај на неправилна употреба. Во прекин е сообраќајот на голем дел од регионалните патишта и некои од железничките пруги, па меѓународните возови сообраќаат со задоцнувања, а и локалниот автобуски превоз се одвива со големи тешкотии.