Енергетски реформи ама и големи маани: Нафтените резерви се намалуваат, пари нема

Добивај вести на Viber

Надоместокот за компаниите кои ги чуваат државните резерви на нафта, а кој државата не го плаќа, но и количината на резерви што ја има Македонија - тоа се едни од клучните нерешени проблеми во енергетиката. За нив свои забелешки има и Европската енергетска заедница (ЕЕЗ). Директорот Јанез Копач од Скопје потенцираше дека ова прашање кое неколкупати се одложува набрзо треба да се реши. И ЕЕЗ очекува Министерствто  за финансии набрзо да ги донесе подзаконските акти со кои на Окта, Макпетрол и на Лукоил ќе им се плаќа компензација за чувањето на резервите. Она што се познато е дека во исто време резервите цело време се намалуваат, оти државата не набавува доволно за резервите, а постојано позајмува од нив за итни интервенции во транспортот или за греење.

„Нивото на нафтените резерви во Македонија кое беше највисоко во целата енергетска заедница се намали, а причината се нерешените односи помеѓу сопствениците на нафтени резерви, ОКТА, Макпетрол и државата, и по четири  години од усвојувањето на Законот. Но, добивме уверување од Владата  дека  во следните месеци овој спор ќе биде решен, а тоа мора да биде направено со усвојување на подзаконски акти кои ќе наметнат цена на надоместот за сопствениците кои ги чуваат нафтените резерви, истакна Копач.

Уљуси Бекири директор на Дирекцијата за задолжителни резерви на нафта за Фактор веќе изјави дека тие дале препорака да се одреди надоместок за услугата, но дека Македонија допрва треба да ги формира резервите.

„Ние дадовме став дека надоместокот треба да се регулира, односно да се донесе нова уредба со која на нафтените компании ќе им се плаќа надоместокот. Треба да се најде решение според кое висината на надоместокот ќе биде прифатлива и за државата и за нафтените компании. Проблемот кај нас е што ние впрочем не сме ги оформиле законските нафтени резерви и практично ги докупуваме, па финансиски е тешко ако надоместокот биде повисок, вели Бекири.

Пред две недели пратениците ги усвоија измените на законот за задолжителни резерви на нафта со кои до 2020 година се одложуваат измени кои требаше да стапат на сила годинава а меѓу кои и тоа државата да не смее да ги користи резервите по потреба на државни и градски фирми за греење и транспорт. Токму во тоа е и клучниот проблем, оти и сега во моментов Македонија сега има резерви за 65 дена, а планот е резервите да покриваат 90 дена.

Фактор веќе пишуваше дека Македонија е единствена земја во која не се плаќа компензацијата, туку со посебна уредба чуварите може да користат 30 отсто од резервите. Во моментов во Министерството за финансии има работна група која работи на подзаконските акти и како што веќе објавивме се договара цената. Владата, според наши сознанија преговара надоместокот да биде што помал. 

Нафтените компании кои ги чуваат резервите од поодамна реагираат на практиката да ги чуваат резервите за без пари. Ако уредбата се пролонгира, и оваа година треба да останат без денар.