ЕРДОГАН ЗА СМРТНА КАЗНА: ЕУ не дава безвизен режим за турски граѓани

Добивај вести на Viber

Европската унија (ЕУ) нема да воведе оваа година безвизен режим за турските граѓани, како што предвидуваше договорот за ограничување на бегалскиот поток што Брисел и Анкара го склучија во март.

Ова го соопшти еврокомесарот за дигиталната економија и општество Гинтер Јотингер, цитиран од агенциите.

Одлуката на европските институции е поради настаните по обидот за пуч во Турција и масовните апсења. Стравувањата се дека политичката поделеност и тензиите во земјата ќе се зајакнат уште повеќе.

Околу 20 000 вработени во полицијата, администрацијата, судството и воени лица беа приведени или отпуштени откако беше спречен обид за државен удар во Турција во текот на ноќта во петок спроти сабота, потсетува новинската агенција.

Јотингер посочи дека нема да има одлука за безвизно патување до крајот на годината, иако законот за укинувањето на визите за турските граѓани е веќе доведен во Европскиот парламент (ЕП).

Од зборовите на еврокомесарот станува јасно дека одлуката е поради можноста Турција да ја врати смртната казна по обидот за пуч.

„Смртната казна е неспојлива со нашите вредности. Ниту една земја не може да стане членка на ЕУ, ако воведе смртна казна“, коментира тој.

Јотингер додава дека не може ЕУ да прифати и држава, која им се заканува на новинари затворајќи опозициски медиуми и отстранувајќи од работа судски службеници.

Еврокомесарот инсистира претседателот на Турција Реџеп Таип Ердоган да одговори на загриженоста на ЕУ за владеење на правото во земјата.