ФАКТОР НА ДЕНОТ: Борбата со пожарите продолжува, помагаат Србите, а пристигнуваат и Бугарите
Објавено во: Македонија 04 Август, 2021
ВО МАКЕДОНИЈА ИМА ДЕСЕТИНА АКТИВНИ ПОЖАРИ
Огнената стихија брзо се шири и во источна Македонија. Пожарот од територијата на Општина Пехчево се шири кон Берово, а беровскиот градоначалник, Звонко Пекевски, побара од населението да се вклучи масовно во гаснењето.
„Ситуацијата со пожарот, кој избувна во атарот на општина Пехчево е исклучително сериозна и полека но сигурно се префрла и на територијата на општина Берово, кон најблиските села. Пожарот е високо на шумските предели на селата, но се шири на голема површина. На терен се ТППЕ од Берово и Пехчево како и Шумското стопанство, Центарот за управување со кризи и ДЗС. Се апелира до месното население, кон масовно вклучување во гаснењето на пожарот, како би се намалиле последиците и штетите би биле помали.Ви благодариме доколку доброволно се вклучите во гаснење на пожарот!“, повика Пекевски на социјалните мрежи.
Борова шума гори во Пехчево. Градоначалникот Драган Тренчовски се надева дека на помош за справување со пожарот ќе пристигнат и пожарникари од Бугарија.Изгореа 14 куќи и училиштето во селото Дренак каде беснее пожар.
ИМА ОСОМНИЧЕНИ ЗА ПОЖАРИТЕ
Полицијата осомничи неколку лица за дел од пожарите во земјава.
Околу 15.10 часот, денеска е лишено од слобода 32-годишно осомничено лице дека подметнал пожар над гостиварското село Пожаране. Лицето со иницијали Л.А. е од Република Албанија, а илегално престојувало во земјава.ЌЕ ИМА НАГРАДА ЗА ПОЖАРНИКАРИТЕ
Парична награда ќе има за пожарникарите. Владата на денешната седница одлучи да ги награди сите пожарникари вклучени во гаснењето на пожарот кој го зафати Кочани и околината.
„Наградата од 10.000 денари е во знак на благодарност за демонстрираната храброст, професионалност и пожртвуваност во мисијата да се спасат животи и да се зачуваат природните ресурси на татковината. Нивната пожртвуваност и професионалност нема да останат заборавени“, информираат од Владата.СКОКНА БРОЈОТ НА ЗАРАЗЕНИ СО КОРОНАВИРУСОТ
Министерството за здравство информира дека согласно податоците од Институтот за јавно здравје, во последните 24 часа се направени 5.276 тестирања, а регистрирани се 164 нови случаи на КОВИД-19 и тоа Тетово – 60, Скопје – 34, Гостивар – 21, Куманово и Битола – по 8, Струмица, Кичево и Дебар – по 5, Штип и Кочани – по 4, Прилеп и Струга – по 3, Берово – 2, Охрид и Пехчево – по 1.
Регистрирани сe 18 оздравени пациенти од: Скопје – 7, Тетово – 6, Куманово – 4, Кичево – 1.
Пријавени се три починати лица : две лица од Гостивар (68г и 86г) и едно лице од Скопје (82г), починати во болнички услови.ЧИТАЈТЕ УШТЕ