Фетаи вели дека СЈО ги предава предметите за да опстанат

Добивај вести на Viber

Обвинителката Фатиме Фетаи во пресрет на судско рочиште за „Монструм“ за медиумите истакна дека СЈО ги предава предметите во Јавното обвинителство, кое истите ќе ги превземе за да не биде во прекин постапката по истите и да се отвори можност за обвинетите да поентираат.

„Не е важно кој ќе гони, важно е секој кој се огрешил пред законот да се соочи со последиците од дејствијата кои што ги имал преземено, изјави Фетаи. „Мислам дека во моментов не треба да не интересираат ситници и моментни настани. Треба сепак да ја гледаме онаа поголемата слика и повисоката цел. Тоа е во моментот да изнајдеме начин да не дозволиме, односно да спречиме тие што се огрешиле пред законот да не одговараат“

Според Фетаи, одредени политичари сакаат преку правни празнини да се извлечат од обвиненијата и во тој случај е подобро некој друг обвинител да ги превземе предметите, отколку тие да бидат оспорени..

„Сметам дека крајната одлука, каква и да е, во однос на судбината на нашите предмети, односно независно од тоа дали ќе биде одлуката дека ние ќе продолжиме да ги застапуваме тие предмети или пак, други обвинители, сепак таа одлука би била подобра од кое било друго решение кое што го посакуваат одредени политичари во моментот, а тоа е преку вешто искористување на одредени правни празнини и злоупотреба на нивната политичка моќ да дојдат до решение кое што ќе значи целосно или делумно одбегнување на кривичната одговорност“, рече Фетаи.

Специјалното јавно обвинителство соопшти дека сите свои досегашни предмети ги испраќа во редовното обвинителство по наредба на специјалната обвинителка Катица Јанева, која во моментов е во притвор како осомничена во случајот „Рекет“ и чиј мандат истекува на 15 септември.