ФОЛКСВАГЕН ДЕМАНТИРА: Ништо не е конечно - производсвото во Русија прекинато
Објавено во: Економија 02 Март, 2023
По првите информации дека Фолксваген ја продал компанијата во Калуга, производителот и руското Министерство за економија излегоа со демант. Оттаму велат дека не е донесена конечна одлука за продажба на компанијата на групацијата Авилон, како што претходно објавија руските медиуми, пренесува Индекс.
Најголемата германска автомобилска компанија Фолксваген преговара за продажба на фабриката во Калуга, Русија, соопштено е денеска, што доаѓа една година откако компанијата го прекина производството и извозот во Русија поради руската агресија врз Украина.
„Една од можностите, кога станува збор за иднината на Фолксваген во Русија, е продажба на средствата на Volkswagen Group Rus, а со тоа и фабриката во Калуга, на трета страна“, рече портпаролот на Фолксваген. Тој додаде дека моментално има преговори за продажба, но дека се уште не се финализирани.
Пред тоа рускиот медиум РБК објави дека рускиот дилер на автомобили Авилон најавил купување на фабриката на Фолксваген во Калуга. Според истите извори, наскоро треба да се потпишат и купопродажните договори.
Фолксваген ги затвори двете фабрики во Русија
По почетокот на рускиот напад врз Украина, во март 2022 година, Фолксваген ги затвори двете свои фабрики во Русија. Во исто време беше стопиран и извозот на возила во Русија.
Во мај, Фолксваген се повлече од фабриката во Нижни Новгород, каде што германската компанија склопуваше возила во соработка со руската компанија ГАЗ, чиј косопственик Олег Дерипаска е на списокот со санкции поради врски со војната.
И други германски производители на автомобили, како што се BMW или Mercedes Benz, исто така се повлекоа од рускиот пазар откако Москва започна инвазија на Украина пред една година.
Фото: EPA-EFE/Filip Singer