(ФОТО) ПЕНДАРОВСКИ: До крајот на годината очекувам да ја постигнеме целта – полноправно членство во НАТО
Објавено во: Македонија 30 Јуни, 2019
Шефот на државата, Стево Пендаровски присуствуваше на најголемата воена вежба во нашата земја, насловена „Одлучен удар“на која учествуваат околу 2700 војници.
За време на вежбата во Битола граѓаните можеа да видат воена опрема, вооружување, војници, старешини кои во изминатите педесетина дена учествуваа на вежбата која се одвиваше на воениот полигон Криволак.
Претседателот на својот фејсбук напиша дека му е посебна чест што во вежбата учествувале и припадници на американскиот контигент, од кои околу 40 проценти биле во составот на мултинационалната вежба.
„ Имавме над 1.200 американски војници на наша територија, што е само показател дека стратешкото партнерство меѓу Северна Македонија и Соединетите Американски Држави трае, успешно е, ефикасно е, и со нивна помош очекуваме до крајот на годината да ја постигнеме и формално најголемата стратешка цел која ја имаме зацртано уште во деведесетите, а тоа е нашето полноправно членство во НАТО“, напиша Пендаровски.
Вежбата „Одлучен удар“ се изведува на армискиот полигон „Криволак“ од 5 јуни до 9 јули и на неа учествуваат околу 2.700 војници од Северна Македонија, САД, Литванија, Албанија, Бугарија и Црна Гора. Целта на вежбата е зајакнување на стандардните оперативни процедури на единиците, подобрување на интероперабилноста, унапредување на заемното разбирање, доверба и зајакнување на меѓусебната соработка.