Фризерката – измамничка на суд, сопругот за коцка и ги трошел парите од становите

Добивај вести на Viber

Скопската фризерка Благица Дончевска денеска повторно излезе на рочиште пред Основниот суд Скопје 1. Ако на распитот пред неколку дена се правдаше дека е невина, а самата била измамена од нејзин роднина, денеска таа се жалеше на сопругот кој на коцка ги трошел парите од становите. На денешното рочиште фризерката сведочеше дека сопругот парите ги трошел на коцка и луксузен живот, а дел од нив им биле за вракање стар долг од 100 илјади евра. Таа призна дека парите за непостоечките станови кои ги зема од измамените граѓани биле ставани на сметката на нејзиниот татко. Сепак фризерката се стави во одбрана на таткото, инаку обвинет за соучесник, за кого што кажа дека не знаел ништо за високите суми на сметката. Сепак немала полномоштво, па сите пари ги вадела во негово присуство, а се правдала со тоа што има фризерски салон во кој одлично заработува. На сметката од таткото полицијата пронајде 800 илјади евра. Дончевска исто така повтори дека оштетените кои ја пријавиле, сами ја ширеле мрежата, нудејќи ги евтините станови на своите пријатели. За возврат, одговори таа,  земале добра провизија. Фризерката беше уапсена минатиот месец бидејќи измамила 42 лица. Им продавала евтини социјални станови за 400 евра од квадрат и ги уверувала дека наскоро ќе бидат изградени. Откако виделе дека се измамени, оштетените ја пријавија во полиција, по што фризерката и нејзиниот татко беа уапсени.