ГАЗДИ „ФАЛСИФИКАТОРИ“ - сами си издавале дозволи за движење, МВР со кривични пријави
Објавено во: Македонија 12 Мај, 2020
Многу газди на фирми сами си издавале дозволи за движење во време на полициски час, односно правеле фалсификати, за што некои заработија и кривични пријави.
„Секторот за внатрешни работи Скопје - Единица за економски и компјутерски криминал до надлежното Основно Јавно Обвинителство во Скопје поднесе кривична пријава против Р.Р.(38) поради постоење основи на сомнение дека сторил кривични дела „непостапување според здравствените прописи за време на епидемија“ и „фалсификување исправа“ во врска со кривично дело „посебни случаи на фалсификување исправи“ и против А.Р.(43) поради постоење основи на сомнение дека сторил кривично дело „фалсификување исправа“.
Првопријавениот во својство на сопственик на правно лице, во кое управител бил второпријавениот, во период на постоење на вонредна состојба и Одлука за забрана и посебен режим на движење на територијата на РСМ, си издал дозвола за движење во период од 16.00 до 21.00 часот и покрај тоа што немал регистрирано сменска и ноќна работа. Притоа, во два наврати бил сопрен и контролиран од страна на полициски службеници и на увид ја приложувал лажно изработената дозвола“, соопшти МВР.
Секторот за внатрешни работи Скопје - Единица за економски и компјутерски криминал, пак, до надлежното Основно јавно обвинителство во Скопје поднел кривична пријава против А.К.(40) поради постоење основи на сомнение дека сторил кривично дело „непостапување според здравствените прописи за време на епидемија“.
„Пријавениот А.К., во својство на сопственик и управител на правно лице, во период на постоење на вонредна состојба и Одлука за забрана и посебен режим на движење на територијата на РСМ, си издал дозвола за движење во периодот од 14.00 до 19.30 часот и покрај тоа што немал регистрирано сменска и ноќна работа. Притоа, на 22.04.2020 бил сопрен и контролиран од страна на полициски службеници и на увид ја приложил таа дозвола“, соопшти полицијата.
Има уште еден случај.
Секторот за внатрешни работи Скопје - Единица за економски и компјутерски криминал поднел кривична пријава против Ш.М.(35), поради постоење основи на сомнение дека сторил кривично дело „непостапување според здравствените прописи за време на епидемија“.
„Пријавениот, во својство на управител на кафе бар, во период на вонредна состојба и Одлука за забрана и посебен режим на движење на територијата на цела држава, си издал „дозвола за движење на вработен“ во која навел дека ја издава заради менаџирање на објектот, а за кој е во важност забрана за работа. На 16.04.2020 во 23.30 часот, за време на забрана за движење, на влез во село Арачиново, пријавениот бил сопрен од полициски службеници, при што на увид ја приложил лажно изработената дозвола“, соопшти претходно полицијата.