Генерали го увериле Пендаровски дека нашата Армија е подготвена за НАТО
Објавено во: Македонија 17 Октомври, 2019
Претседателот Стево Пендаровски, денеска, во касарната „Боро Менков“ во Куманово, присуствувал на воена свеченост, со којашто се одбележа 17 октомври, денот на Здружената оперативна команда.
Целта на единицата е да ги подготви силите на Армијата за одбрана и заштита на територијалниот интегритет и на пошироките интереси на државата, како и да учествува во операции за поддршка на мирот, превенција и справување со конфликти и кризи во операции предводени од меѓународни организации. Здружената оперативна команда се состои од механизирана пешадиска и воздухопловна бригада, бригада за логистичка поддршка, баталјони за врски и на воена полиција, како и команда на резервни сили.
Претседателот Пендаровски се сретнал со неколку генерали во Армијата. Во пресрет на полноправното членство на Северна Македонија во НАТО, во фокус на разговорите биле состојбите и подготвеноста на нашата Армија.
„Во таа насока, соговорниците се согласија дека нашата Армија е рамноправна со војските на останатите земји членки на Алијансата и дека членството на Северна Македонија во НАТО забрзано ќе придонесува кон уште поголемо јакнење на капацитетите на Армијата“, соопштија од Кабинетот на претседателот Пендаровски.