Град Скопје го објави повикот за изведувачи кои ќе треба да ги расположат скопјани
Објавено во: Македонија 13 Април, 2020
Град Скопје, заедно со градските културни институции, го објави јавниот повик за финансирање на проекти, како дел од кризните мерки „Култура во време на корона“ за маалски изведби и виртуелни изложби и претстави.
„Идејата на повикот е пред сè да се поддржат невработените уметници, односно оние уметници кои ги изгубиле своите редовни приходи во овој период, но и да се доближи културата до сечиј дом“, се вели во повикот.
За маалски изведби во времетраење до 2 часа, техничката опрема ќе биде обезбедена од културните установи на Град Скопје; Исто толку време дневно ќе траат и виртуелните изложби, претстави, перформанси, концерти, работилници за деца.
Предност ќе имаат уметници,творци и артисти кои во овој период немаат ангажмани и не се вработени, а треба да имаат место на живеење во Скопје;
Сите учесници ќе добиваат еднаков солидарен хонорар во нето износ од 14.500 денари.. Повикот е отворен од денеска и ќе трае до завршувањето на вонредната ситуација.