Градоначалниците Богоев и Петровска испитани во обвинителството
Објавено во: Македонија 26 Јули, 2019
Градоначалници од кои е можно да бил изнудуван рекет се повикани на информативен разговор во Основното јавно обвинителство заради обезбедување вербални докази. Ваквиот чекор следува откако пред две недели беше отворен случајот „Рекет“ во кој осомничени се Бојан Јовановски и Зоран Милевски, а на специјалната обвинителка Катица Јанева и е одземен едниот мобилен телефон, пред да биде лоциран и вториот.
„Во текот на вчерашниот ден по телефонски повик од јавен обвинител, во обвинителството даде изјава градоначалникот на општина Карпош. Денеска беше повикана и изјава даде градоначалничката на општина Битола. Во интерес на истрагата, обвинителството не е во можност да сподели детали околу содржината на дадените изјави“, се вели во соопштението на ОЈО.
Според напишаното, повикани се Стефан Богоев и Наташа Петровска, градоначалниците на Карпош и Битола.
Од ОЈО велат дека се вршат и други истражни дејствија и дека вештачењата на прибраниот обемен материјал од извршените претреси се во тек.
„По наредба на обвинителството се врши и вештачење на содржината на пронајдениот и одземен втор мобилен телефон на јавниот обвинител“, велат од таму.