Граѓанин до Каменос: Хеликоптерите супер пума каде беа?
Објавено во: Балкан 26 Јули, 2018
Грчкиот министер за одбрана и коалиционен партнер во грчката Влада, Панос Каменос, при неговата посета рано утрово на населбите погодени од катастрофалниот пожар се соочи со гневот на граѓаните, јави дописничката на МИА од Атина.
Две девојчиња низ плач и со гнев му раскажаа како го преживеале пожарот и што се случувало. Пливале 4 часа за да се спасат.
„Тие што седеа на копно изгореа. Тие што беа длабоко во морето, се спасија. Длабоко, онаму каде што не стапнуваш. Дојдоа од крајбрежната служба, но не можеа да се приближат. Ни велеа влезете во море за да се спасите. Како да влезат старите лица? Ни во плитко не можат да пливаат“- кажа едно од девојчињата кое со нејзиниот татко го сретнаа Каменос на улиците во населбите што изгореа во пожарот.
Тие истакнаа дека во морето биле од 18.30 до 23 часот.
„Огнот се изгаси во морето. Леташе стакло и на децата им викав да не гледаат зад нив. 4 часа пливаа. Им велев не се враќајте назад, бидејќи летаат искри во очите“- раскажа таткото на девојчето, кој има член од неговото потесно семејство што со сериозни изгореници се бори за живот во една од атинските болници.
„Господине министре, хеликоптерите супер пума каде беа? Изгореа луѓе“ - праша еден од граѓаните.
Тој рече дека од 20 часот, бродовите биле тука.
Во разговорот со граѓаните, министерот за одбрана рече дека армијата се обидува да помогне, колку е можно повеќе.
Министерот за одбрана, коалициониот партнер во грчката влада и лидерот на Независни Грци, Панос Каменос е првиот министер од грчката влада, кој ги посети населбите погодени од пожарот во кој загинаа најмалку 81 лице, а непознат е бројот на исчезнати.