Грција идентификуваше пет мажи и една жена кои упаднаа на изложбата на македонски уметник во Солун

Добивај вести на Viber

Грција го расчистува инцидентот кој се случи пред два месеци кога група упадна на изложбата на македонски уметник во градот Солун. 

Полицијата идентификуваше уште шест лица од групата, која пред два месеци упадна на изложбата во Солун на македонскиот ликовен уметник Сергеј Андреевски, со што вкупно се идентификувани 11 лица, јави дописничката на МИА од Атина.

Од грчката полиција соопштија дека во рамките на континуираната истрага и по наредба од Основното обвинителство на Солун се идентификувани уште шест лица, пет мажи и една жена, сите грчки државјани на возраст од 20 до 44 години. Полицијата на почетокот на мај идентификуваше пет лица. 

Меѓу идентификуваните е и еден 44-годишен кој е одговорен за комуникација за регионот на северна Грција на подмладокот на организацијата со националистички карактер, на чиј сајт беше објавено видеото од упадот.

Против идентификуваните е покренат предмет за противзаконито насилство, кривично дело со расистички карактеристики и за поттикнување на извршување кривични дела, дела на насилство или раздор против лице врз основа на национално потекло.

На 26 април, група членови на подмладокот на Златна зора, која со судска одлука е криминална организација, со маски на лицата, капчиња и качулки за да ги скријат нивните лица, упаднаа во галеријата на солунската општина Каламариа каде се одржуваше изложбата на ликовниот уметник Сергеј Андреевски.

Упадот го снимија и го објавија на сајтот на подмладокот на Златна зора.