Група граѓани ќе се соберат пред Влада во чест на луѓето кои лежат в затвор за 27 април
Објавено во: Македонија 07 Септември, 2019
На денот на независноста 8-ми септември, утре во 12 часот група граѓани ќе се соберат пред Владата, со цел да порачаат дека луѓето кои упаднаа во Собранието на 27 април не се терористи.
Во повикот објавен на социјалните мрежи стои дека ќе се испрати порака за слобода на уставобранителите и патриоти, за кои се додава дека во никој случај не се терористи.
Поранешниот директор на Биро за јавна безбедност Митко Чавков доби највисока казна од 18 години затвор за настаните од 27-ми април. По 15 години затворска казна добија полициските началници Митко Пешов, Душко Лазаров, Горан Ѓошевски – Леви, разузнавачот Мунир Пепиќ, Јане Чентo, Влатко Трајковски и Никола Митревски- Кољо.
Вилијам Михајловски доби 14 , а Оливер Поповски 13 години затворска казна. По 12 години добија Младен Додевски, Горанче Анѓеловски и Игор Југ. Обезбедувачот на поранешниот директор на УБК Владимир Атанасовски- Оливер Радулов доби 10 години затвор, а вработениот како обезбедување во Собранието Абдуљфета Алими доби 7 години. На обвинетиот Александар Василевски – Нинџа му е изречена казна затвор од 8 години.
Игор Дурловски, еден од водачите на „За заедничка Македонија“ доби ослободителна пресуда.
Осудените се гонеа за кривично дело „терористичко загрозување на уставниот поредок и безбедност“.
Упадот се случи на 27 април 2017 година.