Хотел Континентал со 33% помалку ноќевања во првиот квартал

Добивај вести на Viber

Во се позаострената хотелиерска конкуренција друштвото Интернешенел Хотелс кое управува со познатиот скопски хотел Континентал бележи голем пад на приходите во првите три месеци од годинава кои иако не важат за особено важни пред летната сезона, сепак укажуваат на послаби резултати од работењето. Интернешенел Хотелс во консолидираниот биланс на успех има остварено пад на приходот од 19% во однос на истиот период лани или оперативни приходи од 15,190 милиони денари. Тоа е пад од околу 1 милион евра.

- Првото тромесечие се остварени помали резултати споредбено со истиот период во претходната година, како резултат на намален  обем на работа. Со оглед на тоа дека основна дејност на Друштвото  е хотелско угостителска дејност, остварени се вкупни 3.978 ноќевања што е за 33% помалку споредбено со 2016, посочуваат од Интернешенел Хотелс.

Оперативните расходи на Интернешенел Хотелс изнесуваат околу 323 илјади евра што е идентично како и во ланскиот прв квартал, а во нив нема измени во трошоците за вработените, суровините и другите материјални трошоци.

Финансиските активности исто така откриваат дека Интернешенел Хотелс има прилично високи расходи за камати кои за три месеци изнесуваат 932.000 денари, речиси двојно повеќе во однос на лани, а тоа од друштвото го оправдуваат со активности на реновирање на хотелот.

- Во првиот квартал друштвото продолжи со започнатите инвестиционите активности за реновирање на ресторанските сали и хотелски соби. Средствата се обезбедени од долгорочен кредит, посочуваат во образложението Интернешенел Хотелс.

Хотел Континентал има капацитет од 197 соби и 6 луксузни апартмани. Во склоп на хотелот има ресторанти, ноќен клуб, бизнис центар, салон за убавина, продавница за подароци и други содржини за гостите.

Х.С.