„Хотели Метропол“ е неприкосновен, но „Инекс Дрим“ прави повеќе пари

Добивај вести на Viber

„Фактор“ од достапни јавни податоци го анализираше работењето на најголемите и најпознатите хотели и угостителски ланци на охридско-струшкото крајбрежје. Во битката на најголемите излегува дека најголемиот струшки хотел сам прави поголем профит од гигантите од „Хотели Метропол“ кои се неприкосновени според остварените вкупни приходи од продажба. Охрабрувачки е тоа што лани во споредба сo 2017 година растеле приходите кај двата најголеми провајдери на хотелско-угостителски услуги на нашата најпозната туристичка ривиера

„Метропол Хотели“ лани направил најголем приход од големите и познати хотели на охридско-струшката ривиера, покажуваат официјалните податоци од ревидираните финансиски извештаи на независната ревизија објавени на веб платформата на Македонската берза за хартии од вредност.

Хотелската група „Метропол“ која во својот состав ги има трите хотели „Метропол“, „Белви“ и „Турист“ лани остварила приходи од продажба кои изнесуваат 3,18 милиони евра и се за 20 отсто повисоки од приходите од продажба во 2017 година што е резултат за почит. Оваа голема хотелиерска компанија, во доминантна сопственост на групата „Фершпед“ лани остварила добивка од половина милион евра. Нема јавни податоци за тоа колкаво е учеството во приходната структура на секој од трите хотели.

Наспроти него најпознатиот струшки хотел „Инекс Дрим“ лани сам остварил добивка од половина милион евра и тоа од приходи од продажба кои изнесувале 2,34 милиони евра. Податоците од финансискиот извештај покажуваат дека лани струшкиот хотел има повисока профитна маргина од најголемата хотелска групација на охридското крајбрежје. Во структурата на приходите на „Инекс Дрим“ ноќевањата учествуваат со 715.500 евра, а приходите од продадени храна и пијалоци изнесуваат 1,45 милиони евра. Овој сооднос на приходи укажува на тоа дека „Инекс Дрим“ прави најзначаен приход од организација на свадби и други свечености или конференции. Многу мало е учеството на приходи од автокампот „Ас“ кој работи во состав на струшката хотелиерско-угостителска компанија. За жал не може да се спореди со приходите што хотелите од групацијата „Метропол“ ги прават по тие две основи затоа што во јавно достапните документи не наидовме на таа поделба.

Најпозната и светски призната тераса на охридското крајбрежје „Инекс Горица“ лани повторно работел со загуба. Имено и покрај растот на приходите од продажба компанијата која го управува хотелот „Горица“ и автокампот „Градиште“ лани завршила со загуба од 78.000 евра што е на приближно исто ниво како и 2017 година. Приходите лани изнесуваат 754.000 евра. Од остварени ноќевања приходот лани е 284.000 евра, од ресторански услуги 291.000 евра и од закуп на автокампот „Градиште“ приходот е 50.000 евра.

Најголемиот закуподавач на орхидското крајбрежје „Охридтурист“ лани завршил со загуба поголема од 200.000 евра. Во споредба со загубата во 2017 година лани таа е зголемена за над 10 пати. Компанијата лани од закуп на хотелите „Десарет“ и „Орце Николов“, комплексот „Летница“, рестораните „Ориент“ и „Биљанини извори“ и автокампот „Љубаништа“ инкасирала 400.000 евра што е за 100.000 евра помалку од претходната 2017 година. Охридската туристичка легенда – хотелот „Палас“, кој е дел од портфолиото на оваа компанија, не работи.

Р.Ф.