И членовите во управни одбори ќе плаќаат придонеси!

Добивај вести на Viber

Министерството за финансии го менува Законот за придонеси од задолжително социјално осигурување. Новите измени предвидуваат придонеси да плаќаат и извршни членови на одбор на директори, на управни одбори како и управители во фирми. Според анализата на Министерството за финансии, од  вкупно 58.672 управители во земјава, 18% немале М1 образец, или воопшто не биле вработени во фирмата со која управувале, ниту пак во било која друга фирма. Слична е состојбата и со одборите на директори но и членовите во управни одбори, па така, од 386 извршни членови на одбор на директори, близу 20% немале М1 образец, додека од 820 членови на управен одбор, 35 % не биле социјално осигурани. Според постоечкиот Закон ова е дозволено, бидејќи истите работат согласно договор за управување и не се обврзници за плаќање на придонеси од задолжително социјално осигурување. Со измените, пак, истите задолжително мора да плаќаат придонеси за пензиско, инвалидско и здравствено осигурување. Измените на Законото предвидуваат, основица за пресметка и плаќање на придонеси да биде, плата, дополнителни примања, колективен договор и договор за вработување. Кои се се обврзници за плаќање придонеси од пензиско и инвалиско осигурување? Според Закон, обврзници за плаќање придонеси се вработени во фирми, самовработени лица, основачи на земјоделски стопанства, верски службени лица, привремено невработени, самостојни уметници, врвни спортисти и странци кои во Македонија имаат воспоставено работен однос. Основицата за пресметка и плаќање на придонеси се определува според платата од работен однос, плата од скратено работно време или од дополнитени примања. „За носителите на семејни земјоделски стопанства основицата изнесува 20% од просечно исплатената месечна плата по работник во земјава објавена во јануари во тековната година според податоците на Државниот завод за статистика. За верските лица, социјалните случаи како и самовработените лица во првата година од работењето, основицата изнесува  50% од просечно исплатената месечна плата по работник во земјава“, пишува во предлог измените на Законот за придонеси од задолжително социјално осигурување. С.Н.