И Охридска банка во добивка! Како ја совлада „корона кризата“?

Добивај вести на Viber

Во услови на корона криза Охридска банка значајно го зголеми кредитирањето. Нивото на кредитни пласмани на 30 јуни годинава изнесува половина милијарда евра и тоа е за 31 милиони евра повеќе од состојбата на крајот на 2019 година. Во услови на намалена општа економска активност пад на нето приходите од камати, од провизии и надоместоци и останати приходи од дејноста банката успеа полугодието да го заврши со добивка од 2,5 милиони евра

Петтата најголема деловна банка во земјава, Охридска банка (дел од групацијата на Шпаркассе во земјава н.з.) во првата половина од годинава прокнижи добивка од 2,5 милиони евра. И покрај тоа што добивката на полугодие е за 2 милиони евра пониска од профитот во истиот период лани ова е одличен резултат во услови на намалена економска активност предизвика од корона кризата. 

Најголемиот извор на приходи – нето приходите од камати за првото полугодие изнесуваат 8,5 милиони евра и се за неполни 7 отсто пониски од истиот период лани. Втората најзначајна приходна ставка се нето приходите од провизии и надоместоци и тие, како први на урад на снижената економска активност, се пониски за 17 отсто од лани и на банката и донеле 2,3 милиони евра. Иако мала ставка нето приходите од курсни разлики донеле 943.000 евра и се значајни приходи и покрај тоа што во однос на лани се пониски за 21,5 отсто. Најголемо негативно влијание врз добивката на банката има големиот пад на останатите оперативни приходи од дејноста. Имено, тие годинава изнесуваат 343.000 евра, а лани за првото полугодие биле над 1 милион евра.

Позитивно и охрабрувачки за акционерите е тоа што во услови на зголемена кредитна активност, банката нема загуба заради оштетување нефинансиски средства и резервациите се речиси идентични како и истиот период лани – изнесуваат 3,3 милиони евра.

Кредитирањето на банката за првата половина од годинава изнесува 500 милиони евра и е за 31 милион евра повеќе од крајот на декември лани. Во кредитното портфолио најголемо учество имаат потрошувачките кредити со 41 отсто пред станбените кредити со 40,6 отсто и хипотекарните кредити со 10 отсто.

Во овој период депозитите на депонентите се намалени за 25,6 милиони евра и изнесуваат 461,2 милиони евра. Тоа е резултат на намалувањето кај корпоративните депозити кои се за 30 милиони евра пониски од нивниот износ на крајот на ланската година. Депозитите на домаќинствата во вкупната структура за истиот период се зголемени за 4 милиони евра.