И поевтино и еколошки – Клинички центар ќе се грее на гас

Добивај вести на Viber

Клиничкиот центар „Мајка Тереза“-Скопје, од денеска ќе се грее на гас. Завршено е поставувањето на гасификациска мрежа од речиси 1,5 километри и сите клиники се опфатени со гасификацијата преку централната котларница.  Инвестицијата која чини 450 илјади евра беше обезбедена од Министерството и од буџетите на клиниките, додека градежните работи ги изведе ГАМА. Според министерот за здравство, Никола Тодоров ова е капитална инвестиција која е многу значајна како за заштита на здравјето на граѓаните, така и за поекономично работење. „Завршува една ера на енормно загадување на Центарот, но и на целиот град, имајќи предвид дека во зимските денови тука во Клиничкиот центар трошевме 20 тони мазут дневно или околу 4.000 тони годишно и испуштавме во воздухот околу 100 тони сулфур диоксид годишно. Ова беше еден од главните извори на загадување на центарот, но и пошироко во градот Скопје“, рече Тодоров. Тој потсети дека над 50 години ова беше начин на затоплување во Клиничкиот центар, но со гасификацијата додаде Тодоров, отсега сега клиниките ќе имаат пониски цени за затоплување и трошоците за загревање на објектите во Клиничкиот центар. проценките се заштедата да биде околу 40 проценти. Топланата на Клинички центар беше голем проблем, но и повод за протести на еколошките здруженија изминатиов период.