Иако беше најавено „бомбите“ за масакрот кај Смилковско не се слушаа во судница

Добивај вести на Viber

Во судница денеска не се слушаа „бомби“ за  случајот „Монструм“ како што претходно беше најавено. 

Тие не се слушаа поради најновите случувања во Специјалното јавно обвинителство. 

Обвинителите на СЈО, Фатиме Фетаи и Гаврил Бубевски остануваат да го застапуваат предметот „Монструм“ додека државниот јавен обвинител Љубомир Јовески не донесе одлука за вчерашното барање испратено од шефицата на СЈО, Катица Јанева.

Специјалната обвинителка Јанева од притвор испратила телеграма до обвинителите од СЈО која вчера му беше предадена на државниот јавен обвинител Љубомир Јовески. Во писмото таа назначила дека им дава овластување на тимот обвинители предметите кои се во судска, предистражна и истражна постапка од СЈО да се предадат во Основното јавно обвинителство. Одлуката за барањето на Јанева, Јовески треба да ја донесе најдоцна до петок, односно три дена по приемот на барањето.

Објаснување за тоа што ќе се случува понатаму со случајот „Монструм“ на денешното рочиште побараа и родителите на убиените момчиња кои го замолија судијата да им даде објаснување дали предметот и понатаму ќе го застапуваат обвинителите на СЈО и дали ќе почне од почеток.

Им беше кажано дека предметот нема да се врати на почеток затоа што не се менува судија, туку обвинител,  и во тој случај продолжува онаму каде што застанале. 

Претходно, шест лица беа обвинети и осудени на доживотен затвор за убиството на четири момчиња и еден рибар кај Смилковското Езеро. Двајца од обвинетите се во Косово.

Масакрот се случи на 12 април 2012 година.