Има ли шанси за укинување на Шенгенот и колку тоа би чинело?
Објавено во: Економија, Свет 13 Октомври, 2016
Околу 20 милијарди евра би чинело укинувањето на Шенген зоната во Европа.
На таа сума треба да се додадат дополнителни трошоци од две до четири милијарди евра годишно, што изнесуваат од 0,02 до 0,03% од БДП на државите од Шенген зоната
Ова се наведува во извештај на Европскиот парламент, направен врз основа на истражување на еден непрофитен Институт.
Реалните загуби од враќање на границите е речиси невозможно да се пресметаат, се наведува во документот. Статистиката досега не покажала зголемување на криминалот поради укинувањето на гранични контроли.
Како што се забележува во анализата, наведените суми вклучуваат трошоци за физичко враќање на границите, административни расходи поради контролите, како и загуби за патниците и трговците.
Се очекува во наредните денови да се донесе одлука за тоа дали да бидат продолжени времените гранични контроли што ги воведоа Германија, Австрија, Шведска, Данска и Норвешка.
Се смета дека Данска и Германија ќе побараат контролите да продолжат.
Шенгенскиот договор дава можност за воведување на времени контроли на внатрешните граници во ЕУ во случаи на вонредни околности. Државите, кои времено ги вратија граничите контроли, таквата одлука ја оправудува со миграцискиот прилив.
Најголем дел од граѓаните на европските земји, со акцент на Французите и Британците, сакаат Шенген-зоната да биде укината поради приливот на мигранти, покажуваат резултатите од ланска анкета, чиишто резултати ги објави францускиот весник „Фигаро“.
Според официјалните податоци, минатата година во ЕУ пристигнале 1,2 милиони мигранти.