Институтот за стандардизација стравува дека нема да има пари за членување во ISO
Објавено во: Економија 13 Февруари, 2019
Институтот за стандардизација на Македонија во годишната програма за 2019 стравува дека нема да има пари за членување во меѓународните тела, како што е ISO, каде што се носат светските стандарди, и упати повик да бидат осигурени овие средства од државниот буџет бидејќи постои ризик да биде исфрлен од нив.
„Немање доволно финаниски средства за плаќање на членарината за меѓународните и европските тела за стандардизација може да доведе до исклучување на ИСРМ од овие тела, иако ИСРМ овие средства ги предвиде во Буџетот за 2019 год“, се вели во делот каде што се потенцираат можните ризици.
Македонската стандардизација се претставува со членството во меѓународните организации за стандардизација ISO и IEC и европските организации за стандардизација CEN, CENELEC. Особено е значајно учеството во првото меѓународно тело, познато по своите стандарди ISO 9000 и ИСО 9001 со кои се зголемува конкурентноста на претпријатијата кои ќе ги применат.
ИСРМ, кој дава насоки за стандардизирање на квалитетното работење во градежништвото, претпријатијата, извозот, локалната самоуправа, животната средина и други области, вели дека потребно е сите членарини годинава да бидат обезбедени од Буџетот на РМ. Покрај меѓународните, Институтот подготвува, усвојува и објавува македонски стандарди. За извршување на овие работи и задачи ИСРМ треба да добие дополнителни наменски средства непосредно од министерствата со кои ќе склучи соодветен договор.
Буџетот за оваа година на ова тело со 23 вработени изнесува 350.000 евра, пополнет меѓудругото и од донации и од наплата на членарини и услуги. Не е експлицитно наведено колку треба да се плати за учеството во меѓународните тела, а единствено се знае дека половина се за плати на вработени, околу 45 отсто се наменети за стоки и услуги и 6 отсто за преведувачи.
Усвојување национални македонски и усвојување на меѓународни и европски стандарди и стандардизациски документи како македонски и повлекување на нефункционани и неприменливи македонски стандарди е дел од работата на Институтот.
А.К.