Иванов: Безбедноста на сите притворени и затворени лица мора да биде загарантирана

Добивај вести на Viber

Oд Кабинетот на претседателот на државата, Ѓорге Иванов најостро го осудуваат физичкото насилство што се случи во текот на вчерашниот ден во КПУ Затвор Скопје – Скопје.

Велат дека безбедноста на сите притворени и затворени лица мора да биде загарантирана од затворската управа, за ваквите и слични случаи, не може и не смее да има никакво оправдување. 

„Во казнено поправните установи во Република Македонија  мора  да  се  заштити  психофизичкиот  и  моралниот интегритет на лицата, да се почитува нивната личност и достоинство, како и нивното право на лична сигурност“, стои во соопштението од кабинетот на Иванов.

Оттаму посочуваат дека согласно чл.10 од Уставот „Животот на човекот е неприкосновен“, а согласно чл.11 „Физичкиот и моралниот интегритет на човекот се неприкосновени и се забранува секој облик на мачење, нечовечко или понижувачко однесување и казнување“.

Согласно Законот на кривична постапка, чл.176 ст.1, „При издржување на притворот не смее да се навредува личноста и достоинството на обвинетиот“.

„Во изминатиов период до Комисијата за помилување како и до Одделението за постапување по претставки и предлози во Кабинетот на претседателот на Република Македонија, беа доставени писма од граѓани кои изразуваа загриженост за безбедноста во затворите во Република Македонија. Затоа, очекуваме што побрзо расчистување на овој, како и на сите досегашни случаи, познати или непознати за јавноста. Бараме одговорност од сите надлежни институции“, се наведува во соопштението од Кабинетот на Иванов.

Поранешниот министер Миле Јанакиески е пуштен во домашен притвор, а екс министерот  Спиро Ристовски останува во притвор во Шутка.