Извештај: Суфицит во ФЗОМ, дефицит во ПИОМ
Објавено во: Економија 04 Август, 2018
Полугодишниот извештај за извршувањето на Буџетот на РМ за периодот јануари-јуни годинава покажува дека во првата половина од годината Фондот за пензиско и инвалидско осигурување (ПИОМ) има остварено дефицит од 469 милиони денари, покажува.
До јуни годинава биле остварени приходи од 33.453 милиони денари, 49,2 отсто во однос на планираните за годинава, а на расходите изнесувале 33.922 милиона денари односно 49,9 отсто од годишниот план.
Од вкупните приходи, 18.115 милиони денари се по основ на придонеси за пензиско и инвалидско осигурување (48,6 отсто од годишниот план), 14.640 милиони денари се трансфери од Основниот буџет, 637 милиони денари се приходи од акцизи, а останатите 61 милион денари се други приходи на Фондот.
Според извештајот, во делот на расходите на Фондот, трошоците за пензии се реализирани во износ од 26.792 милиони денари или 49,6 отсто од предвидените за 2018 година, а исплатата на пензиите се одвива во согласност со предвидената динамика за 2018 година. Трансферите од Фондот за ПИОМ до приватните 14 пензиски фондови изнесуваат 3.330 милиони денари, а придонесите за здравствено осигурување за пензионери до Фондот за здравствено осигурување се исплатени во износ од 3.575 милиони денари.
Заклучно со јуни година, Фондот за здравствено осигурување остварил суфицит од 205 милиони денари, со приходи од 14.739 милиони денари, или 51,3 отсто од годишниот план и извршени расходи од 14.534 милиони денари, односно 50,5 отсто од планираните за 2018 година.
Во првите 6 месеци од годинава се остварени приходи од придонеси за здравствено осигурување од 7.716 милиони денари или 48,8 отсто од годишниот план. Додека пак, придонесите за здравствено осигурување на пензионери уплатени од Фондот за ПИОМ изнесуваат 3.575 милиони денари, а придонесите за здравствено осигурување уплатени од Агенција за вработување на РМ се 55 милиони денари.