КАИРО НАПРАВИ ИСКЛУЧОК: Египет ја отвори границата со Газа поради евакуација на повредените
Објавено во: Свет 15 Мај, 2021
Египет денеска ја отвори границата со Газа поради евакуација на повредените лица на единствениот излез што не е под контрола на Израел.
Земјата испрати десет амбуланти во палестинската енклава за евакуација на ранетите во палестинско-израелскиот конфликт.
Официјален Каиро направи исклучок и „ја отвори границата Рафах за премин на десет египетски амбуланти за евакуација на ранетите и нивно пренесување во Египет на лекување”, изјави извор кој побарал да остане неименуван.
Египетското јавно здравје уште вчера најави дека три болници се подготвуваат да ги примат ранетите од Газа. 139 лица загинаа, од кои 39 деца, а скоро илјада се повредени во воздушни напади и бомбардирања на Појасот Газа со кои Израел одговори на палестинските ракетира на својата територија од Појасот Газа, каде на власт е исламистичкото палестинско движење Хамас.
Американскиот претседател Џо Бајден денеска разговарал по телефон со палестинскиот претседател Махмуд Абас за последните конфликти меѓу Израел и Палестинците.
Израелскиот премиер Бенјамин Нетанјаху денеска му соопштил на американскиот претседател Џо Бајден дека Израел прави се за да избегне повреда на луѓе кои не се вклучени во борбата против Хамас и другите групи во Појасот Газа.