Какламанис вели дека договор со македонски јазик и нација нема да помине во Грција
Објавено во: Балкан 04 Јуни, 2018
Пратеникот на Нова демократија, Никитас Какламанис, во интервју за грчкото радио 247 вели дека ако договорот содржи македонски јазик и македонска нација нема да биде изгласан од грчкиот Парламент.
„На пример, ако договорот го содржи она што го кажа претседателот или господинот Заев дека го имаме загарантирано нашиот јазик, македонскиот јазик и нашата нација, дека сме македонски народ, еден таков договор, се плашам, не се плашам, туку се надевам, нема да се изгласа во парламентот, па дури и од оние што се борат за затворање на ова прашање. Не може да се изгласа, од кого ќе се изгласа“- вели Какламанис.
Не е оптимист дека набргу би можело да се постигне договор меѓу двете земји. Како што јави дописничката на МИА од Атина, тој вели дека уште пред месец и половина предвидел дека нема да има решение во текот на јуни или јули, а според него главната причина е, како што рече, „познатата бескомпромисност на Скопје“.