Кирацовски ќе дава исказ за „Рекет“

Добивај вести на Viber

Александар Кирацовски, пратеникот на СДСМ, денеска во Јавното обвинителство за гонење на организиран криминал ќе дава исказ за случајот „Рекет“.

Поранешниот генерален секретар на владеачката партија пред два дена повика сите кои биле „фотографирани и видени со осомничените да сведочат во обвинителството“.

Инаку вчера беше повикана и пратеничката Фросина Ременски, која потоа рече дека сведочела за Меѓународниот сојуз на Бојан Јовановски како прогласен почесен претседател на таа организација.

Ременски и Кирацовски се првите политичари повикани да дадат исказ, а оваа недела веќе таму беа воидителката Лила Филиповска и бизнисмените Силјан Мицевски и Ардијан Амзовски.

„Очигледно, истрагата околу случајот „Рекет“ се одвива длабински, сеопфатно и транспарентно.

Овој процес ќе ја потврди вистината и ќе ја сузбие лагата и шпекулациите. Криминалците ќе бидат изведени пред лицето на правдата, одговарајќи за стореното.

Но, кон овој случај, неопходно е Обвинителството да пристапи и низ општественото огледало кое претежно го креираат политичките напади и инсинуации, лажните вести и конструкциите.

Не смее да остави дамка врз процесот оставајќи разно-разни шпекулации да кружат во јавноста, независно дали се политичка реторика или чаршиски муабети.

Пример, тоа може да го стори единствено ако го повика секој (политичар), кој има макар и една слика со било кој од обвинетите, да го провери контекстот и да ги расчисти дилемите во јавноста.

Можеби е илузорно и непотребно, но ќе го намали просторот за инсинуации и неосновани сомнежи“, напиша Кирацовски на Фејсбук во понеделникот.