ЌЕ СЕ ОДРЖИ ЛИ РЕФЕРЕНДУМОТ: Во Каталонија „окупирани“ неколку училишта
Објавено во: Свет 29 Септември, 2017
Приврзаници на независноста на Каталонија денеска „окупираа“ неколку училишта во градот Барселона, кои се одредени да бидат места за гласање на спорниот референдум за независност на покраината.
Тие ги „окупирале“ овие објекти за да обезбедат одржување на референдумот. Според локални медиуми, „окупирани“ се две училишта во центарот на Барселона.
Каталонската влада денеска соопшти дека референдумот за независност ќе се одржи, додека властите од Мадрид истакнаа дека тој ќе биде спречен.
Повеќе од 2.300 гласачки места се подготвени за референдумот за независност на Каталонија што ќе се одржи в недела, соопшти денеска регионалната Влада на Каталонија.
Во Каталонија беа испратени 4.000 полицајци од Шпанија, откако Уставниот суд на Шпанија го забрани референдумот. Тие се приклучија на веќе присутните 5.000 припадници на шпанската цивилна заштита и на каталонската полиција од 17.000 регионални полицајци. Нивна задача во недела ќе биде да ги држат затворени училиштата и просториите каде каталонската влада ќе организира гласање.