Кои се „најскапите“ договори кои ги планира најбогатата државна компанија во 2019-та

Добивај вести на Viber

Најбогатото државно претпријатие на Македонија, АД ЕЛЕМ, за 2019-та планира 345 јавни набавки, а склучување на договори за помошна механизација и за главен ископ се најдоа на програмата и за оваа година. Оваа компанија во 2017-та беше рекордер од сите други органи, институции, претпријатија, дирекции и јавни агенции според сумата на склучени договори во 2017-та, а таа изнесуваше 4,75 милијарди денари и беше убедливо најголемиот потрошувач. Оваа година, од „мултимилионските“ набавки што може да се издвојат предвидено е ангажирање на помошна механизација, како што вообичаено се работеше во последната деценија, но и купување на сопствени машини како што најави раководството.

Во договор кој се очекува да се склучи во јули, компанијата ќе издвои 7 милиони евра, односно 416 милиони денари само за ангажирање на помошна механизација за потребите на рудниците во Суводол. Во последните десетина години за ангажирање помошна механизација од надворешни фирми, РЕК Битола, подружницата на АД ЕЛЕМ, има платено повеќе од 90 милиони евра. Операторот пак на главниот ископ на јаглен и јаловина во рудникот во Брод Гнеотино ќе биде познат во мај, а се очекува „зделката“ да чини 1,1 милијарда денари, односно околу 18,5 милиони евра. Компанијата во Брод-Гнеотино нема своја механизација и со години им плаќа на надворешни фирми за тие да вршат ископ на главните количини јаглен кои се копаат токму таму.

Во програмата на Електрани на Македонија е предвидено и купување на машини за рударска експлоатација од 1,35 милијарда денари што е и најголемата набавка во планот, а набавувачот би требало да биде познат во јуни. Исто така се планира и купување на сопствена помошна механизација од околу 20 милиони евра за рудникот Суводол.

За одржување и поправки, односно за ремонтни активности на термоелектраната се предвидени 460 милиони денари, а договорите со операторите се очекува да бидат склучени во јуни.

За своето работење ќе купува мазут од 473 милиони денари, односно ќе се дадат безмалку 8 милиони евра за овој енергенс, а природен гас ќе се купува за 460 милиони денари, односно за нешто повеќе од 7,5 милиони евра. Бензин и дизел ќе се купува за 93,5 милиони денари за сопствените бензински пумпи на АД ЕЛЕМ.

Милион евра се предвидени за физибилити студија за деценискиот проект ХЕЦ Чебрен, за кој вицепремиерот Кочо Анѓушев најави повторно заживување, а ќе има и оглас за изградба на пристапен пат до таму за седум милиони евра.

За телекомуникациско опремување и вмрежување се предвидени 10,5 милиони евра, а понудата ќе се одбере околу средината на годината.Околу 1,5 милиони евра се предвидени за автобуси и 2,5 милиони евра за реконструкција на интерен пат.

Милиони евра се предвидени за реконструкции и за замена на делови, како и санација на Блок 2 од РЕК Битола, а за рударско-електричниот комбинат ќе се бара оператор кој би проектирал и изградил нова управна зграда за 313 милиони денари.

Не е познато, односно во планот нема детали за тоа на колку години, односно до кога ќе бидат роковите за извршување на договореното.

Александар Кузмановски