Кој е мотивот на Макпетрол да селектира новинари?

Добивај вести на Viber

Макпетрол на денешната прес конференција очигледно имаше селективен пристап кон новинарите, односно само преку потврдена листа одобруваше влез на медиумите. Прашањето е зошто Макпетрол на еден важен настан не сака присуство на новинари кои најдобро ги следат актуелните случувања, како со компанијата така и со пазарот, особено што и досега постоеле обиди од компанијата да не враќа одговори на анализите кои Фактор ги обработува?

Главната цел поради која Фактор имаше намера да присуствува на пресот е да постави неколку прашања кои се од интерес за инвестициската, но и пошироката македонска јавност. 

Ни требаат одговори до каде е постапката за преземање на Макпетрол и во која институција е заглавен процесот? Помина речиси една година од објавата на намерата на Балкан Петролеум, но има молк кај надлежните институции што се презема во овој период за да се разјасни ситуацијата и дали постапката е се уште активна што може да влијае врз вредноста на акциите на Макпетрол. 

По објавата, пазарната цена на акциите почна да расте, а „Макпетрол“ од тогаш до сега значајно го подобри своето финансиско работење, додека пак добивката постојано се прераспределува за откуп на сопствени акции.

Меѓу другите прашања кои не интересираат како редакција на Фактор се и колкаво е пазарното учество на „Макпетрол“ во малопродажба на нафтени деривати за првите осум месеци во однос на „Лукоил“? 

Има ли простор за оптимизам дека со новата Влада ќе ги надминете недоразбирањата и незавршените судски спорови за сопственоста врз ГАМА?

Дали Макпетрол се задоволни од резултатите или работат на тоа да ги зголемат приходите од продажба на стоки за широка потрошувачка на бензинските пумпи? 

Очекуваат ли РКЕ да ги земе во предвид нивните аргументи за утврдување на трговската маржа за нафтени деривати и дали во блиска иднина може да очекуваме на пумпите да има малопродажни цени кои би биле пониски од максималните пропишани?

Не интересира и за членството на ќерката и зетот на Андреа Јосифовски во Управниот и Надзорниот Одбор на Макпетрол. Дали со нивното членство во раководните тела Макпетрол стана семејно управувана компанија?

Ова се прашања на кои компанијата треба да биде подготвена секогаш да ги одговори како во интерес на инвеститорите, така и на јавноста. Недавањето пристап на редакцијата на Фактор или било која друга медиумска куќа треба да биде и објаснето.