„Кока-кола“ ја прекрши својата традиција-Ќе го произведе својот прв алкохолен пијалок
Објавено во: Свет 07 Март, 2018
После 125 години „Кока-кола“ за првпат во својата историја ќе ја прекрши традиција и ќе произведе алкохолен пијалок, што ќе биде наменет за јапонскиот пазар.
На овој начин компанијата сака да профитира од зголемената популарност на „чу-хи“ – газиран ароматизиран пијалок, измешан со локалниот алкохол „шочу“. Ваквите производи вообичаено имаат од три до осум проценти алкохол и во Јапонија се познати под името алкопоп.
„Тоа е пијалок во лименка што содржи алкохол. Традиционално, се прави од алкохол наречен ‘шочу‘ и газирана вода, плус некоја арома. Досега не сме експериментирале во алкохолната категорија, но ова покажува дека сакаме да испитуваме можности надвор од нашите основни области“, изјави претседателот на „Кока-кола Јапонија“, Хорхе Гардуњо, додавајќи дека тој, најверојатно, нема да се продава надвор од Јапонија.
„Чу-хи“ во Јапонија се рекламира како алтернатива за пиво и особено е популарен меѓу жени. Најголемите јапонски компании за пијалоци имаат голема палета производи и продолжуваат да експериментираат со стотици вкусови.