Колку годишно ќе дава државата за поевтино да летаме?
Објавено во: Економија 03 Декември, 2018
Според новата владина програма дополнителното субвенционирање за уште поевтини нискобуџетни летови ќе ја чини државата 104 милиони денари годишно.
Министерството за транспорт и врски во петокот по трет пат го објави огласот за финансиска поддршка за нискобуџетен авиопревозник, по неуспешните два обида на „Виз-ер“ како единствен конкурент.
И според ноемвриската владина уредба и според програмата од истиот период, како и огласот на министерството за транспорт и врски, финансирањето треба да започне од март 2019-та и да заврши во март 2022, а се работи за вкупна сума од 312.420.000.00 денари, односно 5 милиони евра.
Првата година на авиопревозникот ќе му се исплатат 86 милиони денари, во 2020 и 2021 по 104 милиони денари, бидејќи се работи за календарски целосен период и 17 милиони денари за остатокот од 2022. И претходната владина програма за периодот од 2015 до 2018 година ја имаше истата сума, што значи дека новото раководство за истите пари поставува повеќе услови, односно бара повеќе ангажираност од авиокомпанијата што ќе се избере, ако се знае дека овој пат во игра се критериуми за охридскиот „Св.Апостол Павле“.
Според ноемвриската уредба што ја донесе Владата, најдоцна до 26 Март 2019 година авиопревозникот треба да воспостави или да одржи база од најмалку еден авион на еден од аеродромите во Македонија и да започне со оперирање на најмалку две нови дестинации од „Меѓународен аеродром Скопје“ и најмалку четири нови дестинации од аеродромот „Св. Апостол Павле“ – Охрид. Со тоа што за охридскиот аеродром првите две нови дестинации треба да се познати до 26 Март 2019 година, а останатите две во рок од една година од денот на склучување на договорот.
Понудените нови дестинации не смеат да се совпаѓаат во Скопје и Охрид и секоја нова дестинацијада биде постојано опслужувана најмалку два пати неделно. Секоја нова дестинација воведена да не е опслужувана со редовен воздушен превоз во последните две ИАТА сезони од или до Скопје и Охрид.
Корисникот на финансиска поддршка треба да изработи
план за промоција и маркетинг, а истиот да може да се менува на укажување на давателот на финансиската поддршка.
A.K.