Компаниите до утре треба да се пријават за отпис на долгови

Добивај вести на Viber

Утре истекува рокот до кој компаниите, банките и извршителите треба да се пријават дали ќе учествуваат во владиниот проект за отпис на долгови за социјално ранливите категории граѓани. Во текот на следната недела ќе се знае конечната листа на компании кои ќе отпишуваат долгови за неплатени сметки, кредити и такси. Својот интерес да се пријават на огласот на Министерството за финансии досега го изразија најголемиот број од банките во земјава, ЕВН и извршителите. Право на еднократен отпис на долгови ќе имаат лицата кои заклучно до 31 декември 2013 година имале статус на корисник на социјална помош или постојана парична помош, невработени лица кои подолго од една година активно бараат работа како и граѓани изложени на социјален ризик поради инвалидитет, тешка болест или смрт, под услов доколку заедно со брачниот другар имаат максимален годишен приход од 1.700 евра и не поседуваат друга недвижност, освен онаа во која што живеат. За да го искористат ослободувањето од долгови, тие ќе треба да се пријават на огласот што за таа цел ќе биде распишан кон средината на месецов, по што ќе следи проверка дали ги исполнуваат законските услови. Од Министерството за финансии очекуваат целата постапка да заврши во октомври и потсетуваат дека отписот ќе биде еднократен и нема да се повторува како мерка. Се проценува дека мерката ќе опфати меѓу 50.000 и 100.000 граѓани кои имаат проблем да си ги подмират обврските. За отпишаниот долг доверителите, односно правните лица кои ќе се пријават, ќе добијат право на даночен кредит во висина на одреден процент на долгот кој нема да биде повеќе од 10 отсто од отпишаниот долг.