Компаниите и нивниот имиџ

Добивај вести на Viber

Доколку би слушнале гласини дека швајцарските банки не се сигурни за вложувања, дека германскиот производител на автомобили Audi ги намалил безбедносните стандарди за да ги намали производните трошоци или пак дека Баерсдорф го намалил квалитетот на своите производи, дали би поверувале? Сигурно дека не!  И покрај тоа што не ги знаеме фактите, ние предходно веќе имаме изграден став и перцепција кон овие субјекти, што е резултат на константниот квалитет на овие производи, како и на долгорочните кампањи за односи со јавноста кои овие субјекти ги воделе во минатото. На изградената репутација, за да денес претставуваат синоним за квалитет во своите категории. Неретко знаат да се појават информации дека пијалокот Кока Кола не е многу здрав, но повеќето луѓе и понатаму гo конзумираат и не ни помислуваат да се откажат. Тоа е резултат на создадениот имиџ, навика или преференција во однос на конкурентите, на приказната за овој производ што е и најголемата вредност на еден бренд, најголемиот капитал на една компанија. Ретки се македонските компании кои се изборија за тој статус и кои можат да се пофалат дека се имаат наметнато во својата категорија на “свој терен” дури и во ситуација кога со квалитет и не заостануваат зад конкурентите. Тоа е поради нивната пасивност, недостаток на промотивни активности, и во најчест случај препуштеност на стихијноста. Дури и кога ќе им се понуди соработка, која во вредност  е како неколку бизнис ручеци, не се решаваат да започната да ги користат односите со јавноста, како ефективна промотивна вештина. Нашите супермаркети се преплавени со странски производи, кои се повеќе ги истиснуваат домашните, едноставно не се создава дополнителна вредност на македонските производи. А малку треба! За само една година континуирана кампања за односи со јавност, вредноста на брендот ќе се зајакне, сигурно финансиските резултати ќе се подобрат, потрошувачите ќе преферираат домашни производи, ќе има нови вработувања, и ќе се размислува за странските пазари. Градењето квалитетен бренд со постојан квалитет и неговата кредибилна промоција се две работи подеднакво важни! Дури и јавни кампањи од типот купувајте македонски производи, кои секако ги поддржувам, не можат многу да помогнат, доколку работата не се сработи во својот двор! Денес, компаниите кои имаат револуционерни производи, монополска позиција на пазарот или привилигирана положба во општеството што само по себе им носи успех, се многу малку! Сите останати доколку сакаат да успеат, треба да создаваат пријатели, да влијаат на луѓето односно да развиваат позитивен и ефикасен однос со својата јавност. Ова се однесува подеднакво за компании, јавни или државни институции, спортски федерации, НВО, јавни личности, кои треба да ги искористат односите со јавноста и да креираат посакуван имиџ. Да воспостават двонасочна комуникација со својата јавност, преку која компанијата ќе ги оствари своите цели, а јавноста ќе се убеди дека со добиената информација знае нешто повеќе или дека добива поголема вредност. Стратешки осмислените односи со јавноста подразбираат подготовка, добро познавање на состојбите и на можностите за развој, и пред сè социолошки и психолошки афинитети. Мал дел од македонските компании практикуваат односи со јавност, но сепак она што фали е конзистентност, постојана комуникација се јавноста. Нешто ќе се направи, па 4-5 месеци пауза, односно не се користат придобивките на континуираните активности. Менаџирањето на односите со јавноста наликува на проникливите психолошко, социолошки анализи од романите на рускиот писател Достоевски, на неговите анализи за луѓето по тоа како се облечени, како се насмевнуваат и начинот на кој зборуваат. Менаџерот за односи со јавноста треба да биде во состојба ‘’да гледа во стаклена топка’’ и да предвидува реакции и последици. Тоа не е нешто што е вродено, да потребни се предиспозиции, но пред сè е потребно искуство, посветеност и многу работа.  Кампањите за односи со јавноста поминуваат неколку основни фази: Дефинирање на целната група, анализа на моменталната состојба, дефинирање на целите, избор на главната порака која ќе се комуницира и на канали на комуникација, временски план и дефинирање на неопходниот буџет, и на крај мониторинг и евалуација на ефектите од самата кампања. Цел на активностите се: стручната јавност, креаторите на јавното мислење, институциите на системот, пошироката јавност, и секако посебно важно медиумите, поради нивната огромна дисперзивна моќ и влијание. Можеби односите со јавнсота како активност се тешки за реализација, но имајќи го во предвид нивното влијание, кредибилитет, моќ за создавање имиџ, оправданоста за нивна реализација е голема, а ефектите секако повеќе од позитивни. Ова не се однесува само на активностите на македонските компании дома, туку и надвор од границите на Македонија. Средствата кои ќе ги потрошат се навистина мали, и вреди да се обидат. Лошиот имиџ тешко се поправа, а добриот треба постојано да се одржува! Сашо Дуљанов