КОВИДОТ ОСТАВA ТРАГИ ПО МЕНТАЛНОТО ЗДРАВЈЕ: По прележувањето на вирусот, многу луѓе се борат со депресија

Добивај вести на Viber

По прележување на коронавирусот, многу луѓе се борат со депресија, панички напади, анксиозност.

Ова го потврдуваат психолозите и психијатрите кои советуваат засегнатите да не чекаат, туку да  побараат стручна помош. Велат дека луѓето кога ќе се заразат, се опседнати со негативни емоции, размислуваат за тешки последици по здравјето, но и за смртта. Пост ковид депресијата може да го попречи нормалното функционирање на луѓето, и да влијае на нивната концентрација  при работа. Стручните лица раскажуваат дека има многу луѓе кои самите биле заразени, но воедно имале и смртен случај во семејството како последица на вирусот.

„Луѓето се во голема неизвесност поради вирусот затоа што тоа не е обична настинка. Размислуваат за смртта, си прават морбидни сцени, размислуваат за здравите органи кои вирусот ги напаѓа и за последиците. Едноставно треба да си направат еден филтер на вести кои ќе ги примаат. Има многу видови на депресија и таа може да се третира со психотерапија и со медикаменти. Луѓето да не мислат дека само од себе ќе помине, туку потреба е терапија. Но, многу зависи и од тоа каква била психолошката состојба на луѓето претходно. Има луѓе кои се со повисока самодоверба, и кои полесно ќе се носат со таа психолошка состојба“, вели психологот Милка Ололоска.

Психијатарот Симеон Могилевски објаснува дека од пост ковид депресијата се погодени сите возрасни групи, но најчувствителни се повозрасните и жените. Според него, кај луѓето кои се на возраст над 50 години, во 80 отсто од случаите се јавуваат психички проблеми по соочување со коронавирусот. Додава дека младите полесно поминуваат, но тоа не значи дека по неколку години нема да ги почувствуваат последиците по менталното здравје. Колку брзо поединецот ќе се справи со болеста, зависи и од тоа колку долго се „измачувал“ без да побара стручна помош, дали претходно имал други стресни состојби или  не.

„Има и мажи кои бараат помош, но жените и генерално повозрасните полесно развиваат депресивна слика. Постарите во текот на живот повеќе се психички истрошени. Младите полесно се носат со тоа, тие не се толку импулсивни, некои ги прикриваат симптомите, но тоа не значи дека по 5 години нема да се соочат со психички проблеми или да се јават фобии кај нив. Третманот може да трае 4-5 месеци, а кај некои пациенти и повеќе“, рече Могилевски.

Оваа тема ја третираат и многу истражувања. Анксиозност, депресии и несоница според една британска студија на Универзитетот Оксфорд се најчестите долгорочни последици од заболување од ковид- 19.

Научниците од Центарот за биомедицинско истражување на Оксфорд открија дека секој петти пациент може да развие проблеми со менталното здравје како последица на болеста. 

фото freepik.com