Криминалците бегаат од Биткоинот!
Објавено во: Економија 03 Јануари, 2018
Криптовалутата биткоин на почетоците имаше огромна популарност во криминалното подземје, па со неа можеше да се тргува со дрога, оружје, да се порачува детска порнографија, како и да се плаќаат нарачани убиства за мафијашките организации. Сега, со брзата и екстремна популаризација на биткоинот се воведени и повеќе механизми за следење на трансакциите, па така криминалците се поретко ја користат оваа криптовалута за перење пари или вршење на нелегални плаќања.
Повеќе безбедносни агенции меѓу кои ФБИ и Европол креираа сопствени механизми за следење на криминалот, па така штом имаат сознанија дека ќе се изврши нелегална трансакции ги известуваат берзите на кои се врши замена на валути да ги стопираат трансакциите во кои има сомнежи дека се инволвирани лица од подземјето.
Тоа не значи дека криминалците целосно ќе се откажат од биткоинот или пак дека целосно ќе се откажат од криптовалутите. Затоа се бележи зголемен раст на различни видови на криптовалути кои нудат уште подобра заштита на идентитетот и приватноста на трансакциите со енкрипција на податоците како што се Монеро и Зкеш.
Основачите на криптовалутите Монеро и Зкеш велат дека нивните дигитални производи не се наменети за криминалците, туку дека самата природа на финансиските средства е привлечна за таков вид на активности бидејќи пред се е заштитена приватноста и дека мнозинството од нивните корисници се легални сопственици на криптовалути кои не вршат никаков вид на криминал.