Кривична пријава за сметките за парно – Регулаторна ги оштетила граѓаните за 5 милиони евра?!

Добивај вести на Viber

Стрезо Стрезовски од Скопје, поднесе кривична пријава до Јавното обвинителство против вработени во Регулаторна комисија за енергетика и нова иницијатива до Уставниот суд со која бара да се укине Одлуката за зголемување на цената за ангажирана моќност во сметките за парното, објави весникот „Дневник“.

Стрезовски тврди дека Регулаторна комисија за енергетика (РKЕ) неосновано ја зголемила цената за ангажирана моќност за 55,96 отсто од март до јули годинава и дека со тоа на граѓаните им причинила материјална штета која ја проценува на повеќе од 5 милиони евра. Неговата пресметка покажува дека цената за ангажирана моќност требало да падне за 2,58 отсто, а таа на топлинската енергија за 21,74 отсто. - Пријавата се однесува на кривично дело злоупотреба на службената положба и овластувања и за повреда на рамноправноста на граѓаните, кои ги сториле Н.Н. одговорни и овластени вработени во Регулаторната комисија за енергетика при одредувањето на цената која граѓаните – корисници на системот за затоплување ќе ја плаќаат за ангажираната топлинска моќност. Овие одговорни и овластени вработени, во рок од пет месеци, од март до јули 2013, неосновано, за 55,96 отсто ја покачиле цената на ангажираната топлинска моќност и со тоа на граѓаните им причиниле огромна материјална штета. Така направената штета може да се процени на преку 300 милиони денари, односно повеќе од 5 милиони евра – образлага Стрезовски во кривичната пријава до Јавното обвинителство испратена на почетокот на месецов.