Македонците догодина ќе играат лото на интернет

Добивај вести на Viber

Во текот на идната година и Македонците ќе имаат можност да играат лото на интернет, пишува Дневник. Имено, Државната лотарија на Македонија распиша јавен повик за склучување договор со искусна компанија за формирање заедничка фирма за приредување електронски и интернет-игри на среќа. Во новото друштво, кое е утврдено да има главнина од нешто над 12 милиони евра, Државната лотарија на Македонија треба да биде доминантен сопственик со 51 отсто од главнината, а за нејзин влог ќе се смета ексклузивното право за приредување електронски игри на среќа во земјава без временско ограничување, како и ексклузивното право да приредува интернет-игри на среќа во период од две години. Cпоред законот, новата фирма ќе има двегодишен ексклузивитет во организирање вакви игри на среќа, а потоа и овој пазар ќе биде либерализиран. Од идниот партнер се бара во новата фирма да вложи 6 милиони евра, од кои 4,7 во опрема и во софтвер, 300.000 евра во хардверска и во софтверска поддршка и еден милион евра паричен влог за покривање на финансиските трошоци за оперативно функционирање на новото трговско друштво. Предвидените средства ќе треба да се вложат во период од три години, при што во првата година влогот треба да изнесува 3 милиони евра.