Македонија под просекот на светскиот раст во 2018-та
Објавено во: Економија 09 Октомври, 2018
Македонија ќе се најде под проектираниот просек на светски раст во 2018-та, откако Меѓународниот монетарен фонд објави дека глобалното БДП оваа година ќе биде 3,7 отсто, односно исто како и лани.
Неколку дена претходно Светска банка за Македонија прогнозираше дека годинава ќе има раст од 2,5 отсто, односно подобрување во однос на лани кога БДП-то беше чиста „нула“.
Меѓународниот монетарен фонд (ММФ) ги намали своите прогнози за светската економија поради зголемувањето на каматните стапки и интензивирањето на тензиите во трговијата.
Финансиската институција ги намали прогнозите за 19-те земји кои го користат еврото, како и
за Латинска Америка, Блискиот Исток и Субсахарска Африка.
ММФ очекува економијата на САД годинава да забележи раст од 2,9 отсто, но да забави до
раст од 2,5 отсто следната година, поради намалувањето на ефектот од неодамнешните
намалувања на даноците и трговската војна со Кина.
ММФ ја намали прогнозата за еврозоната до раст од два проценти, наместо очекуваните 2,2
отсто, поради трговските тензии со САД и загриженоста во врска со Брегзит. Финансиската
институција го намали проектираниот раст по вторпат оваа година. Во април, ММФ очекуваше
раст од 2,4 отсто во еврозоната.