Македонија зависна од дознаките од странство

Добивај вести на Viber

Албанија и Македонија се земји кои во голема мера се зависни од дознаки од странство, кои играат важна улога во обезбедување дополнителна социјална заштита и искоренување на сиромаштијата. Освен тоа, дознаките од странство имаат клучна улога и врз образованието и здравјето на членовите на семејствата кои остануваат дома.

Ова го покажа истражувањето на проектот на македонската организација Аналитика и АКСЕР од Албанија што го спроведоа во изминатите 18 месеци во регионот на Скопје, во Македонија и на Тирана, во Албанија.

Резултатите што беа претставени на денешната работилница на тема „Миграции и дознаки од странство во Западен Балкан“ покажуваат дека во делот на влијанието на образованието отсуството на таткото има негативно влијание врз образованието на децата само краткорочно, доколку тој останува подолг престој влијанието е позитивно.

- И во двете земји миграцијата на мајката на долг рок има негативно влијание врз образованието на децата, потврдувајќи дека миграциите како појава имаат значително влијание врз образованието на децата чии родители имаат мигрирано во странство, рече Јованка Јошевска од Проектот.

Резултатите покажуваат дека во поголемиот број случаи таткото е заминат во странство, а мајката е останата во земјата да се грижи за семејството.

Таа додаде дека во однос на образованието, се покажа значителна разлика помеѓу Албанија и Македонија во врска со ефектот на дознаките од странство – додека тие имаат влијание врз образованието на децата со тоа што дел од тие средства се алоцираат за плаќање на нивното образование и со тоа имаат позитивно влијание врз детското образование во Албанија, во Македонија се покажа дека дознаките од странство немаат значително влијание врз статусот на образование на децата.

Резултатите од проектот во однос на влијанието врз здравјето за Албанија покажаа дека децата во семејства со миграциско искуство имаат помала веројатност да бидат неразвиени од оние во семејства без миграциско искуство. Додека влијанието за Албанија се покажа позитивно, за Македонија резултираше дека е негативно – децата во семејства со миграциско искуство се подебели. И за двете земји се покажа дека нивото на образование на мајката е важно за децата да бидат помалку дебели.

Јошевска истакна дека и во двете земји не е покажана иницијатива за промовирање на ефектите на миграциите и дознаките од странство врз социо-економскиот развој бидејќи државните политики за миграции се претежно општи и не таргетираат специфичности како во случајот со областите образование и здравство. Затоа, дел од препораките се владите да понудат политики за намалување на негативните ефекти од мигрирањето на родителите врз децата, вклучување на влијанието на миграциите и дознаките од странство во политиките за образование и здравство, воведување политики за поттикнување на мигрантите да ги инвестираат заработените средства во својата земја, овозможување едноставен пристап до образование и здравствено осигурување...

Според резултатите, Јошевска посочи дека Албанија и Македонија треба и да ги подобрат своите системи за прибирање податоци за да може да се обезбеди подобра база на податоци.