„МАКОШПЕД“ ИМА НОВ ДИРЕКТОР - Гоце Димитроски дојде на позицијата претседател на Одбор на директори
Објавено во: Економија 22 Мај, 2023
Преку многу кусо соопштение испратено до инвеститорската јавност преку Македонската берза, шпедитерската компанија „Макошпед“ известува дека во ова акционерско друштво дошло до промени во органите на управување.
Практично, таму е назначаен нов прв човек, односно претседател на Одборот а директори, и на таа позиција е именуван Гоце Димитроски.
„ТД Макошпед АД известува дека со одлука од Одбор на директори за Претседател на Одбор на
директори е назначен Гоце Димитроски“, се вели во кусото соопштение од компанијата до Берзата.
А, еве кои се главните акционери на „Макошпед“ со над 5 отсто од капиталот, според најновите податоци од Централниот депозитар за хартии од вредност.
Имено, најголем акционер е трговското друштво МЕПКОМ Кочо, кое поседува 19,03 отсто од акциите, а веднаш зад него со 18,9 отсто, е компанијата Уготур, која се занимава со угостителство, исхрана и туризам.
Третиот најголем акционер, пак, со 12,93 отсто од капиталот е компанијата на успешниот кавадаречки бизнисмен, Илија Гечев, ИГМ Трејд.
Додека, пак, самиот Макошпед си поседува 10 отсто од акциите како сопствени акции.
Н.Н.Ф.